Mánadagin 6. oktober koma umboð frá Kanada, Norra, Íslandi og Írlandi at vitja Útoyggjafelagið. Hetta er í samband við arbeiðsfund um verkætlanina Economusée.
Frá mánadegnum 6. til hósdagin 9. oktober er Útoyggjafelagið vertur fyri arbeiðsfundi um verkæltanina Econoumsée. Hetta er fyrsti fundurin í Føroyum. Frammanundan hava fundir verið í Kanada, Írlandi, Norra og Íslandi.
Nú er verulig gongd komin á verkætlanina, og fundurin í Føroyum er startskotið til tann verkliga partin. Øll londini hava nú valt 1-3 virki, ið skulu skipast til Economusée. Her í Føroyum koma tey fyrstu tiltøkini at vera á Trøllanesi, í Skúgvi.
At luttaka í Economusée krevur, at tað er eitt privat virkið, ið fast við handverk ella heimavirkið, og at ein kann liva av hesum. Av tí at útoyggjarnar nógv tey mongu árini hava verið í stórari afturgongd, er slíkt virksemi í flestu førum farið fyri bakka. Men tó so, enn finnast fólk, ið partvíst fáast við handverk, ella teirra forfedrar hava gjørt tað, og mong fáast eisini við heimavirkið. Hetta verður tí útgangsstøði í føroyska partinum av verkætlanini.
Tey komandi árini, fer útoyggjafelagið at stremba eftir, at stovnseta eitt fjølbroytt úrval av Economusée´um í Føroyum. Miða verður í móti, at tað verður eitt á hvørjari útoyggj. Sum frá líður, er ætlanin, at virkir á meginøkinum eisini koma við í verkætlanina.
Málið við verkætlanini er fyrst og fremst at skapa inntøkugevandi virksemi á útoyggj. Av tí at hetta tiltak hevur ferðavinnuna sum málbólk, kemur eisini annað avleitt virksemi. Tey sum luttaka koma at vinna pening, samstundis sum tey eru við til at varveita siðbundið handverk, søgu og mentan.
Ein av aðaltáttinum í hugskotinum Econumsée er innovatión - tí kemur ein partur av virseminum at snúgva seg um, at menna nýggjar vørur.
Tey virkið, sum byrja, fevna um jarnsmíð, tog og tekstil framleiðslu.
Í hvørjum luttakaralandi, verður ein stýribólkur skipaður. Hesin skal tryggja fakliga støði og skipanarliga grundarlagið í verkætlanini. Í Føroyum verður hesin bólkur samansettur við umboðum fyri Granskingardepilin fyri samfelagsmenning, Samvit, vinnuhúsið, Landsstýrið, umframt søgufrøði og arkitektur.
Her er meira kunning um verkætlanina, umframt eitt tíðindaskriv.