Fíggjarlógin fyri 2008, inniheldur ikki tær stóru upphæddirnar til virksemi á útoyggj, hetta hóast tørvur er á nógvum ábótum og nýíløgum, men tó so, tað eru smávegis batar at hóma.Á útoyggj vera stórar vónir settar til, at henda samgongan fer at raðfesta uppstiging av útoyggjnum sera ovarlaga. Tað var við spenningi, at hugt var í fíggjarlógaruppskotið fyri 2008, men sum so ofta fyrr, vóur ikki tær stóru upphæddirnar at hóma.
Tað sum liggur teimum flestu, ið búgva á útoyggj á sinni, er at ábøtur vera gjørdar á samferðsluna. Tað verið seg havnirnar, skipini, ferðaætlaninar og á tyrluflúgvingina. Men tað nyttar einki at hava góða samferðslu, um einki arbeiði er, og tí eru tiltøk, ið stuðla undir vinnu, eisni harðliga tiltrongd.
Av útoyggj frættist, at tey eru glað fyri, at tað hóast alt eru nakrar krónir settar av til vinnumenning. Hesum hava vit bíða leingi eftir. Hesin møguleiki, at søkja um stuðul til íverksetan av vinnu, hevur ikki verið til staðar fyrr, og tað eru fleiri verkætlanir, ið nú fáa ein møguleika at koma í gongd.
Tað er sera trupult at fáa bankafígging á útoyggj, tí er eitt ískoyti til startkapital kærkomið. Hetta kann vónandi gera, at bankarnir eru betur sinnaðir til at veita fígging.
Bert smávegis er sett av til samferðslu í ár, men í Skúgvi verður sagt, at tey vanta at skjøtil verður settur á, at byggja nýggja havn har komandi ár "alt er klárt, so nú bíða vit bara eftir pengunum" verður sagt úr Skúgvi.
Bæði í Fugloy og Svínoy, bíða tey spent eftir avloysaranum til Másan. Hetta má vera eitt skip, ið økir um komfortin men eisini títtleikan, verður sagt. Frustratiónin er stór, serliga í Svínoy, har tey i nógv ár hava fingið í vón, at fáa tunnil og havn, men enn er einki hent. Her má ein loysn finnast, ikki á Eiðinum, men loysnin yviri í Havn er tann einasta, um ikki ein undirsjóvartunnil verður gjørdur.
Nýtt skip til Mykinesar og Skúvoyar, og øktur títtleiki á Hestleiðini, hetta til Hestur verður knýtt upp í tunnilin til Sandoynna. Hetta eru ynskini á hesum trimum farleiðum. Í Koltri, er alneyðugt at fáa eina kai, har bátur kann leggja at, umframt veg niðan til bygdina.
Tað eru eisini neyðugt við øðrum ábótum, eitt nú skal vegurin oman til havnina í Mykinesi gerast av nýggjum, og tyrluflúgvingin til fáa eina uppraðfesting.
Hetta eru alt tiltøk, ið skulu tryggja farleið og møguleikan at koma til og frá, men tað eru onnur økið, ið tørva eina góða hond, tað er m.a. skúlabygnaðurin, tiltøk til frama fyri sosialan tryggleika og trivnað.
Vónandi verður ein menningarætlan sett í verk fyri útoyggjarnar, soleiðis at tey sum búgva á útoyggj, kunnu hóma eina framtíð, har tað ikki longur gongur niður á bakka, men har tað gerst lættari, at velja at búgva á útoyggj.
01-05-2008