Mánamorgin kl. 9.30 fer Útoyggjafelagið á fund við Landsstýriskvinnuna í samferðslumálum, at umrøða siglingina millum Gomlurætt og Hestoy.
Landsstýriskvinnan leggur upp til, at gera eina royndarskipan, har tað ikki verður Teistin, men eitt annað minni skip, ið kemur at røkja hesa farleið.
Fyri hestfólk er tað sera umráðandi, at fáa trygd fyri, at talan er um eina royndarskipan, og Útoyggjafelagið vil hava greitt at vita hvat hetta inniber.
Útoyggjafelagið hevur longu gjørt Helenu Dam á Nestabø greitt, at vit á ongan hátt kunnu góðtaka, at Brynhild verður sett í sigling um Hestfjørð. Hetta skip røkir í dag Mykinesleiðina, og tað er ein sera vánalig loysn, tí hetta skip livir ikki upp til tænastustøðið, ein kann bjóða ferðandi í 2008. Tað kemur sera ofta fyri, at fólk koma við karmi í land, í Mykinesi, tí skipið ikki er bygt til ferðafólk men til fiskiskap.
Inniber henda royndarskipan, eina øktan títtleika, ein túr við Teistanum hvønn morgun til skúlabørnini, og ein góð loysn á farmaflutninginum, kann tað vera grundarlag undir eini góðkenning av, at gera eina royndarskipan. Alt sum viðførir, at umstøðurnar á Hestleiðini gerast verri enn tær eru nú, fara vit ikki at góðtaka.