Hóast bert fá fólk eru í summum útoyggjum um jólini, so er jólahugnin eins góður og aðrastaðni í landinum.
Í onkrum av bygdununum á útoyggj, eru bert fá fólk nú um jólini. Eitt nú í Hattarvík, eru tey bert 4 fólk, jóladagarnar, og í Mykinesi eru tey 9. Jólini verða tó hildin við gávum, góðum mati og hugnaligari samveru. Í fleiri av útoyggjunum, er tað siðvenja, at bygdafólkið hittast til jólahugna í skúlanum, og í so máta er einki undantak í ár.
Bygdirnar á útoyggj eru, sum flest aðrastaðni prýddar við ljósum, jólatræ og ljósið í gluggunum. Men tað eru tó ikki allar kommunur, ið eru líka raskar, at taka sær av trivnað og hugna, tí í Mykinesi, er hvørki jólatræð ella ljósperur í gøtunum. Sørvágs kommuna hevur í ár gloymt, at hon eisini varar av Mykinesi.
Tey sum búgva í Mykinesi siga, at tey sjálvandi sakna tann hugan, ið jólatræði og ljósini í gøtunum geva, men hugnin innandura er eins og undanfarin ár, sera góður.