Sandoyartunnil - umvegis Hestoy.
Útoyggjafelagið stuðlar undir tiltakið, at gera undirsjóvartunnil til Sandoynna. Samstundis er tað ein sjálvsagdur lutur, at hesin tunnil eisini tekur Hestoynna uppí kervið. Hestfólk eins og útoyggjafelagið hava gjørt vart við hetta ynskið/kravið heilt frá byrjan av. Fleiri áheitanir eru sendar Landsstýrismanninum í vinnumálum, og undirskriftinnsavnan hevur verið við sama endamáli.
Tunnilin til Hest og Sandoy, kemur eisini at gagna Skúvoy, tí við hesum far Skúvoy munandi betur samband. Tá nýggjur bátur kemur at røkja siglingina til Skúvoynna, verður tað laga manni, at fáa vinnuvirksemi í Skúvoy. So alt um alt fer tiltakið við einum tunnili til Sandoynna, at gera mun fyri 3 oyggjar og fyri alt landið sum heild.
Skrivið, ið var sent Landsstýrismanninum í Vinnumálum var soljóðandi:
Vinnumálaráðið
Tinganes
100 Tórshavn Klaksvík 23.06.07
Att: Bjarni Djurholm
Útoyggjafelagið vil við hesum, heita á landsstýrismannin í vinnumálum, um at skipa so fyri, at tunnilin til Sandoynna, um hesin verður veruleiki, verður lagdur um Hestoynna.
Gott ferðasamband er lívæðrin hjá útoyggjunum, og tá eitt so gott høvi bíðst, sum ein udnirsjóvartunnil til Sandoynna, er tað einki annað enn ein vanlukka, um hesin ikki verður lagdur umvegis Hest.
Kostnaðurin er høgu fyri ein slíkan tunnil, og tí er tað sera upplagt, at Hestur verður ein partur av hesi ætlan, tá nú hetta høvið býðst. Tann meirkostnaður, ið verður, skal samanberast vit tørvin á einari nýggjari ferju, bæði íløgu og rakstri, og hædd skal takast fyri, at farleiðin eisini skal lúka framtíðar krøv, bæði til títtleika og komfort, eins og lýst í samferðsluætlanini.
Men tann størsti vinningurin, við at knýta Hest upp í tunnilsætlanina verður, at enn ein oyggj verður knýtt at meginøkinum. Við hesum hevði Hestoy fingið allar teir menningarmøguleikar, ið ein slík samanbinding inniber, og tað er ein stórur vinningur fyri bæði tey sum búgva í Hesti, men ikki minst fyri føroyska samfelagið sum heild.
Við vón um at okkara sjónarmið verða hoyrd.
Vinarlig heilsan
Óla Jákup úr Dímun, formaður
Olga Biskopstø, samskipari