Í Mykinesi eru tey so von við, at einki hendir, at tey nú í tríggjar mánaðir hava latið um seg ganga, at stórsekkir við rotnum mati og øðrum húsarhaldsaffalli liggja niðri á støð. Súlan hevur ikki røkt farmasiglingina, og Sørvágs kommuna tykist ikki at gera nakað.
Súlan hevur tikið sær av farmasigling til og frá Mykinesi. Hon hevur ført oljutunnur og annan farm til oynna, og flutt burturkast av aftur oynni. Men síðan í juli mánaða, hava Mykinesfólk ikki sæð Súluna.
Fyrst var Súlan til Skúvoyar, í sigling fyri Sildbera, sum var til umvælingar, síðani fór hon norður til Hvannasund, har hon hevur røkt sigling til Fugloy og Svínoy.
Tað sum undrar tey sum búgva í Mykinesi er, hví tað hevur gingið so long tíð, uttan at nakað hendir. Stórsekkir við húsarhaldsaffalli lógu í hitanum í juli og luktaðu, og teir liggja har enn. Nú er nógv komið afturat, m.a. skinn o.a. Makkur er komin í og tað er sera ótespiligt.
Hvør hevur ábyrgdina
Tey sum búgva í Mykinesi undrast á, at Sørvágs kommuna ikki hevur tikið um endan. Tað er kommunan, ið hevur ábyrgdina av at rusk og affall kemur til IRF, og er tað hon, ið eigur at finna eina loysn.
"Vit eru so von við, at einki hendir her útið. Soleiðis sigur eitt av bygdafólkunum í Mykinesi. "Vit hava so ofta gjørt vart við alt møguligt, sum er galið, men einki hendir. Síðan Mykines fór upp í Sørvágs kommunu, er so slett einki hent, og tað munar einki við nakrari lokalari nevnd. Tað er kommunan sum hevur ábyrgdina av hesum, og hon veit hvussu støðan er her úti" sigur bygdamaðurin m.a.